Aktiviteiten

aktiviteiten

Mooie opbrengst sutelaktie

door

sutelaktie-2016-foto-anneke

Maendag 19 september wodde bi’j de Stellingwarver Schrieversronte de jaorlikse sutelaktie ofsleuten. De vri’jwilligers zorgden mit mekeer, deur veur € 7.000,- te verkopen, veur een mooie opbrengst. Mit naeme de verschillende routegidsies, et boek ’De sprokies van Grimm in ’t Stellingwarfs’ en de Stellingwarver Spreukekelender wodden goed verkocht.

Krek as bi’j ere, vergeliekbere, instellings et geval is, zicht et bestuur van de stichting liekewel dat et tal sutelders wat weerommelopt. Deurdat meensken vandaege-de-dag langer deurwarken (moeten) liekt iene van de redens daorveur. Een ere reden is dat in de periode van de sutelaktie, an et aende van augustus, begin september, de hieltied meer meensken nog even op vekaansie gaon.

De sutelaktie begint in 2017 op maendag 4 september.

Pietermannen in De Kuunder

door

femmie-2-12-2015  klaas-31215-4

Femmie van Veen en Klaas Dijkstra vertellen over Pietermannen in De Kuunder en over hoe De Lende warkelik ontstaon is (foto’s: Sietske Bloemhoff)

Jim kun et geleuven of niet, mar in twielochten kon et bi’j de revier De Kuunder ommeraek geveerlik wezen. Niet op alle plakken, mar veural bi’j oolde kolken. Bi’j Berkoop is nog zoe’n stee, waor aj’ verhipte goed uutkieken moesten. Daor zatten in vroeger tieden Pietermannen in et waeter. Aj’ d’r dichte bi’j in de buurt kwammen, kon et zomar gebeuren dat die je bi’j de bienen grepen en je et waeter in trokken… Hoe dat allemaole percies zat, en as et d’r vandaege-de-dag ok nog zo geveerlik is,  kuj’ geweerwodden aj’ mitdoen an de fietstocht mit verhaelen, now kommende zundag 25 september. Femmie van Veen zal et je, bi’j de sluus tussen de Meulereed en de Tjongervallei, percies uutstokken! Ok op drie ere plakken staon verhaelevertellers klaor, zoas Johan Veenstra (Cranberryfarm, De Hoeve), Klaas Dijkstra (begin De Lende, Tronde) en Frank Spijkers (Karkeweg, Buil).

De fietstocht kan tussen 10.00 en 12.00 ure begonnen wodden bi’j et kantoor van de Stellingwarver Schrieversronte in Berkoop (Willinge Prinsstraote 10), mar ok bi’j kefé-resteraant Boszicht in Ni’jberkoop (Bovenweg 26). De tocht is 52 kilemeter, mar kan onderwegens makkelik inkot wodden. An et aende is d’r veur ieder een aorighied as andaenken. De kosten bin € 5,00 per persoon en kun an et begin van de tocht betaeld wodden.

Pompoenen en boeken

door

pompoenemark-16

Jim gaon toch vandaege of morgen ok even naor de gezellige pompoenedaegen bi’j de kezeboerderi’je van Van der Gun in Berkoop? Ok de SSR staot daor mit een mooie kraom vol Stellingwarver negosie. Vandaege wodt die bemand deur Akkie Zijlstra (rechts op ‘e foto) en Albertha Zwaagstra van de warkgroep Publiciteit. Morgen zorgen Ypie v.d. Boer en Johan Veenstra veur de kraom. De foto wodde maekt deur Albertha Zwaagstra.

Mooie aovend mit Stellingwarver en Friese verhaelen

door

freddie-en-gjalt-16-9-16

De Stellingwarver en Friese verhaelen van Freddie de Vries (links) en Gjalt de Groot vullen oflopen vri’jdagaovend 16 september ommeraek in de smaek. Op de gezaemelike literaire aovend van de Fryske Krite van Oosterwoolde en de Stellingwarver Schrieversronte kwammen goed vuuftig personen of. De Groot vertelde veural verhaelen uut zien jonge jaoren die hi’j deurbrocht in de omgeving van Wergea. Nao et schoft vertelde hi’j o.e. op humorische wieze over et vieren van Sunderklaos eerder, mar ok hoe hi’j now as pake zien kleinkiender veur et lappien hoolt…

Freddie de Vries las een zestal verhaelen veur uut eigen wark. Ok die warkten goed op ‘e lachspieren van de bezukers, zoas et verhael  hoe via et pergramme Spoorloos een onbekende zeune veur et locht komt. Ok et verhael waoromme een Stellingwarver skiër besluut om mit zien breuken bienen en ribben naor et ziekenhuus van Meppel te gaon en niet naor dat van Et Vene, is slim vermaekelik.

In 2017 wodt opni’j een literaire aovend orgeniseerd, dan mit een extra feestelik jubileumtintien, omreden et dan de vuufde keer wezen zal disse suksesvolle aovend gezaemelik orgeniseerd wodt.

Tiedens de aovend, die in De Miente in Oosterwoolde was, dee boekhaandel Bruna goeie zaeken mit de verkoop van Stellingwarver en Friese boeken.

 

Aovend mit Stellingwarver en Friese verhaelen

door

freddie-boekekraante

Netuurman en schriever Freddie de Vries (foto: Lenus v.d. Broek)

Vanwegens de Stellingwarver sutelaktie en de Friese boekemaond orgeniseren de Fryske Krite (Oosterwoolde), en de Stellingwarver Schrieversronte opni’j een gezaemelike literaire aovend. Die aovend is op vri’jdag 16 september in et aktiviteitencentrum De Miente in Oosterwoolde. Freddie de Vries, netuurman en schriever, zal op zien eigen humoristische wieze verhaelen veurlezen uut eigen wark. Datzelde geldt ok veur de Friese inbreng van netuurman en verteller Gjalt de Groot.

Et is alweer de vierde keer dat in dit saemenwarkingsverbaand een Stellingwarfs/Friese literaire aovend orgeniseerd wodt. Et pergramme van 16 september begint om 20.00 ure, de toegangspries is veur leden van de Krite en de Schrieversronte € 6,00, eren betaelen € 7,50.