Zaoterdagaovend 8 oktober was de twiede veurstelling van de Baskische film ‘Amama’ mit de ondertiteling in et Stellingwarfs. De film wodde vertoond in de bovenzael van De Zon in Oosterwoolde en wodde orgeniseerd deur de warkgroep ‘Filmwerf’ van Stichting Kunstwerf en de Stellingwarver Schrieversronte. D’r kwam flink wat volk op of, en ieder was et d’r nao ofloop over iens: Amama is een prachtige en indrokwekkende film en goed verzorgd mit een prima Stellingwarver ondertiteling. Veur dat laeste zorgde Henk Bloemhoff uut Oosterwoolde.

Amama wodde eerder twie keer in Liwwadden vertoond, en was doe veurzien van een Friese ondertiteling. Et initiatief veur de Friese en Stellingwarfstaelige variaanten nam EBLT / EBKT, et Europese buro veur kleine taelen, waor ok de Stellingwarver Schrieversronte bi’j ansleuten is. ‘Amama’ in et Stellingwarfs wodde financieel meugelik maekt deur de perveensie Frieslaand.

Van 5 tot 16 oktober is et weer kienderboekeweke! Op tal van schoelen wodt in die periode extra veurlezen, ok in et Stellingwarfs. Zo las Femmie van Veen van Hooltpae o.e. veur in de Tuundörpschoele in Wolvege. Ze bruukte dit keer et ni’je boek ‘Sprokies van Grimm in ’t Stellingwarfs’. De kiender geneuten ommeraek van et sprokien ‘De wolf en de zeuven geities’.

7 OKTOBER 2016

De Duutse singer-songwriter Otto Groote haelt zien inspiraosie uut de Duutse volksmeziek van de jaoren ‘70 en ‘80. Veurbeelden veur him bin o.e. et duo Jan und Jörn en Helmut Debus. Hi’j zingt zien lieties in zien memmetael et Plattduuts, iene van de Nedersaksische taelen, krek as bi’jglieks et Grunnings en et Stellingwarfs. Zien lieties valen op deur de rustige klaanken ofwisseld mit levendige melodienen en et gebruuk van zien mooie waarme stemme. Gien inkeld optreden is etzelde en is dus alle keren een unieke belevenis. Een anraoder om naor toe te gaon!

Tied: 20.00 ure | Intree €9,00 online, €10,00 in de zael

Links: Klaas Dijkstra las een volksverhael veur over et ontstaon van De Lende. Rechts: Johan Veenstra vertelde uut eigen wark in de tuun bi’j de Cranberryhoeve. (Foto’s: Lenus v.d. Broek) Linksonder: An de Karkeweg in Buil vertelde Otto, heer van Buil, zien verhael. Rechtsonder het Femmie van Veen et bi’j de sluus tussen Berkoop en Ooldehoorn over vroeger tieden, doe d’r in oolde kolken van De Kuunder nog Pietermannen veurkwammen… Hielemaole onderan: Lekkers pruven bi’j Marijke van de Cranberryhoeve! (Foto’s: Hans Salverda) 

Roem dattig meensken deden mit an de deur de Stellingwarver Schrieversronte orgeniseerde fietstocht mit verhaelen. Tiedens de tocht die mit prachtig zommers weer deur et middengebied van Stellingwarf gong, vertelden Klaas Dijkstra, histotolk Frank Spijkers, Johan Veenstra en Femmie van Veen oolde volksverhaelen of uut eigen wark. Halverwege de tocht dee al blieken dat veul meensken enthousiast weren over disse biezundere tocht. Et doel is dan ok dat de SSR in 2017 opni’j een vergeliekbere tocht orgeniseren zal.