Aktiviteiten

  

De kursus ‘Stellingwarfs veur beginners’ gong oflopen maendag uut aende in de Hoolten Klinte in Appelsche. Tiedens disse kursus is d’r veural ommedaenken veur et schrieven en praoten van die zo mooie oolde Nedersaksische tael. Dat pat wodt verzorgd deur dr. Henk Bloemhoff en Mark van Veen. Ien van de lesaovens is d’r liekewel ok andacht veur de geschiedenis van Stellingwarf. Dat onderdiel wodt verzorgd deur Geert Lantinga van Wolvege. Nao ofloop van de kursus verzorgt Lantinga butendat een exkursie in een Stellingwarfs netuurgebied. (Foto’s: Lenus v.d. Broek)

De zanggroep ‘k Wait nait’ wun de eerste pries mit ‘Stellingwarfs bedrog’ (foto: Lenus v.d. Broek)

De twiede pries was veur Serge Epskamp mit ‘Kri’jen op et veld’ (foto: Lenus v.d. Broek)

De dadde pries gong naor Flashbang mit ‘Gisteraovend’ (foto: Lenus v.d. Broek)

Zaoterdagaovend 12 november wun de zanggroep ‘’k Wait nait’ et Stellingwarfs Meziekfestival 2016 mit et lied ’Stellingwarfs bedrog’. Serge Epskamp wun de twiede pries mit ’Kri’jen op et veld’ wiels de dadde pries naor de band Flashbang gong mit ’Gisteraovend’. Et Stellingwarfs Meziekfestival was dit keer in De Miente in Oosterwoolde. Roem over de honderd bezukers zorgden mit mekeer veur een sfeervolle muzikaole Stellingwarver aovend. Behalven de drie winners van de wedstried deden an et festival mit: Lammy Bruyns (zi’j wun veurig jaor de eerste pries), et duo The Lion Rules, et koor Elser Smart en De Scheve Schaats Band. Deur ziekte moest de band Spirit of the Dark verstek gaon laoten. De jury beston uut Gerda Hoogeveen, Philomène Bloemhoff en Appie van Riesen. De prissentaosie was, op heur bekende enthousiaste wieze, in hanen van Anna Span, veur et veurtreffelike geluud zorgde Kor Slofstra. Et festival wodde rechtstreeks uutzunnen deur de lekaole omroep Odrie. Et doel is dat de Stellingwarver Schrieversronte et festival ankem jaor opni’j orgeniseren zal in Oosterwoolde; de eerste dielnemers gavven heur al op.

D’r was ommeraek veul belangstelling én wardering veur et festival (foto: Lenus v.d. Broek)

Ok Lammy Bruyns, de winneres van veurig jaor, dee weer an et festival mit (foto: Lenus v.d. Broek)

Veur een smaekvol optreden zorgde et duo The Lion Rules (foto: Lenus v.d. Broek)

Veur een sprankelende prissentaosie zorgde Anna Span (‘Pippi van Odrie’) (foto: Lenus v.d. Broek)

Veul lof was d’r ok veur et koor ‘Elser Smart’, mit oolde Stellingwarver ’tradionals’ as De Bakkiesman en Waor de Lende (foto: Lenus v.d. Broek)

De Scheve Schaats Band brocht bekende covers mit Stellingwarver vertaelings die goed in de smaek vullen (foto: Lenus v.d. Broek) 

 

 

 

… is et zoveer! Dan is et Stellingwarfs Meziekfestival in Oosterwoolde, in De Miente dit keer. Ien van de bands die mitdot komt uut de Westhoek van West-Stellingwarf. Flashbang bestaot uut een stel jongkerels, die ommeraek goed mit heur meziek an de gang is.

Flashbang tiedens een optreden in de Muziekfabriek

Flashbang treedt de hieltied meer op en het intied een grote groep fans. Ni’je weke is de groep veur et eerst te zien en te heuren in Oosterwoolde, én veur et eerst mit een eigen nommer in et Stellingwarfs!

Et festival begint om 18.00 ure en is tegen 24.00 ure oflopen, de toegang is vergees. Veur wie beslist niet kommen kan: et festival wodt live uutzunnen deur de lekaole omroep Odrie.

 

 

Kiender van de Tjongeling genieten van et haandboekebienen (foto: Sietske Bloemhoff)

Tiedens de kienderboekeweke (5 tot 16 oktober) orgeniseerde de warkgroep ‘Alles rondom tael’ van Stichting Kunstwerf een tal warkwinkels haandboekebienen veur leerlingen van et basisonderwies. Drie erveren haandboekebiensters van Stichting Handboekbinden, o.e. Corrie Los uut Oosterwolde en Annina Lingsma uut Wolvege, gongen een goed ure an de slag om mit leerlingen van losse katerns en een omslag een boekien te maeken. Veur sommige groepen wodde daorveur een Stellingwarfs verhael bruukt mit et thema van de kienderboekeweke: Pake en Beppe.

Zes verschillende groepen van de basisschoelen de Tjongeling ( Oldeberkoop) en de Stelling  (Makkinga) weren arg enthousiast mit disse biezundere techniek an de gang, en konnen een fraai risseltaot mit naor huus toe nemen.

De warkgroep ‘Alles rondom tael’ bestaot uut Femke Adams (boekhaandel Bruna), Klaasje Herder (biebeltheek) en Sietske Bloemhoff (Stellingwarver Schrieversronte).