Aktiviteiten

aktiviteiten

Annie Ligthart bi’j Schrieversronte

door

Vanof disse weke bin bi’j de Stellingwarver Schrieversronte in Berkoop schilderi’jen te zien van Annie Ligthart uut Oosterwoolde. Ligthart is veural bekend as de schilderes van De Lende; een peer jaor leden was wark van heur mit dat onderwarp in Berkoop tentoonsteld.

Dit keer bin d’r mit naeme schilderi’jen te zien, waorbi’j de schilderes heur inspireren laoten het deur o.e. et Stellingwarver laandschop. Mar soms tilt Ligthart onderwarpen uut heur warkelike omgeving en zet ze in een deur heur keuzen laandschop. Dat maekt daj’ bi’j et bekieken van et wark de hieltied verrast wodden deur somstieden opmarkelike keuzes.

Et is een anraoder om dit ni’je wark van Annie Ligthart te bekieken. Dat kan t/m jannewaori op deensdaegen en woensdaegen tussen 10.00 en 16.00 ure. Plak: Stellingwarver Schrieversronte, Willinge Prinsstraote 10, Berkoop. De toegang is ommenocht.

’Dichter’ bi’j de netuur

door

Fietsen in de netuur mit dichters:

  

  

Op zaoterdagmiddag  27 oktober is d’r een fietstocht van zoe’n 25 kilometer deur de mooie omgeving van Hooltpae en omgeving. Onderwegens zal Freddie de Vries wat vertellen over de netuur en de kultuurgeschiedenis van disse streek. Tiedens de tocht zullen d’r ok  een tal bekende Stellingwarver dichters mit fietsen; dat bin o.e. Attie Nijboer, Harmen Houtman en Johan Veenstra. Zi’j zullen onderwegens inkelde van heur gedichten veurdregen op een toepasselik plak. Al mit al een goeie reden om de fiets uut et schuurtien te haelen! En et kost ok nog es hielemaole niks…

De tocht begint om 14.00 ure bi’j kefé Wever in Hooltpae. Et mitdoen an disse tocht, die deur Freddie in gezaemelikhied mit de Stellingwarver Schrieversronte orgeniseerd wodt, kost niks.

Aj’ van doel binnen en gao mit, wi’j’ je dan even opgeven bi’j Freddie de Vries? Zien tillefoonnr. is 0561-688749

Foto’s: Lenus v.d. Broek, Sietske Bloemhoff, Andries van Huizen en Freddie de Vries

Weven mit Marianne Kemp

door

  

 

Oflopen vri’jdag verzorgde keunsteneres Marianne Kemp uut Utrecht een warkwinkel weven veur de groepen acht van de basisschoelen De Tjongeling van Berkoop en De Stelling in Makkinge. Die beide warkwinkels weren nog in et kader van et Under de toer-projekt De Verdwenen Peerden. Marianne Kemp warkt en weeft veul mit peerdehaor, vandaor dat ze vraogd was veur et geven van de warkwinkels op beide schoelen. Omreden de theatertocht De Verdwenen Peerden him ofspeulde in de dörpen Ni’jberkoop en Berkoop kregen die beide schoelen dit anbod. De aovend d’r veur gaf Kemp een slim interessaante lezing over heur wark as keunsteneres. De lezing liekegoed as de warkwinkels zollen geven wodden veurofgaonde an De Verdwenen Peerden op 3 en 4 augustus, mar deur ziekte van Kemp mossen die uuutsteld wodden. Veur wie meer weten/lezen wil over et wark van Marianne Kemp rikkemederen we heur webstee an:  http://horsehairweaving.com.

Op ‘e foto’s: de leerlingen van groep acht van De Stelling weren slim enthousiast over de warkwinkel en geneuten daor meraokels van (foto’s: Lenus v.d. Broek)

 

Harmen Houtman dreug veur uut eigen wark

door

  

Tiedens een gezaemelike literaire aovend van de Fryske Krite en de Stellingwarver Schrieversronte dreugen de schrievers Martsje de Jong (Fries) en de Stellingwarver Harmen Houtman veur uut eigen wark. Harmen Houtman, die mit een ni’je bundel in de weer is, dreug disse aovend veural veur uut zien dichtbundel ‘Dichterbi’j’. Vermoedelik nog dit jaor verschient zien bundel mit verhaelen, waor now al veul belangstelling veur is. Op de aovend, die holen wodde in De Miente in Oosterwoolde, dee boekhaandel Bruna goeie zaeken. De aovend wodde orgeniseerd in et kader van de Stellingwarver en Friese sutelaktie en boekeweken. (Foto’s: Lenus v.d. Broek)

Weven mit peerdehaor

door

 

Now kommende donderdagaovend 27 september is d’r in textielinstituut HAWAR in Berkoop een lezing van en prissentaosie deur keunstener/weefster Marianne Kemp uut Utrecht. Kemp vertelt over heur wark en ontwikkeling angaonde et gebruuk maeken van peerdehaor in heur keunstobjekten. De aovend is een onderdiel van De Verdwenen Peerden, een projekt van de Stellingwarver Schrieversronte en iene van de 32 manifestaosies van et perveensiaole LF-2018 projekt Under de toer.

Et pergramme begint om acht ure, anmellen kan bi’j hawar@hawar, de kosten bin € 5,00.

De dag d’r op zal Marianne Kemp twie warkwinkels verzorgen op de basisschoelen van Berkoop en Makkinge. Ze gaot mit de leerlingen in de weer mit et warken mit peerdehaor. Ok disse lessen bin een onderdiel van De Verdwenen Peerden.