Redaktie

Vlanbi’j ‘Het Mad’ in Oosterwoolde (zie 534) zag Hans Salverda de straotnaeme ‘De Fenne’ en maekte ok hier een foto van. Et kan hier doelen op een oolde venne die hier eerder west het, of et kan verwiezen naor een hoeke laand die lege lag en daoromme vaeke nat was. Now wodde mit naeme vroeger wel vaeker ‘Fenne’ schreven, mar et woord het gewoon dezelde betekenis as ‘Venne’.

In Oosterwoolde hebben nogal wat straoten een Stellingwarver naeme, en soms ok diels. Zoas ‘Het Mad’. Want et zol aenlik wezen meten ‘Et Mad’. ‘Mad’ is trouwens een oppervlaktemaot veur laand. Hans Salverda maekte, al fietsende deur Oosterwoolde, disse foto.

Philo Bloemhoff was jaoren projektleider streektael an de Iesselakedemie, now ‘Overiesselakedemie’. Ze was in 1990 betrokken bi’j de naemgeving Kuunderse Sluus an de ni’je verbiening tussen De Lende en De Kuunder (de revier). Zol et bod d’r nog wezen? Ja, ontdekte ze op 27-7-2024. Op heur verzuuk maekte de Kuunderse sluuswaachterske doe disse foto.

De Menning is de naeme van een verzorgingshuus in Wilhelminaoord. Een menning of menninge is etzelde as een reed. Een zaandweg deur et laand naor een hoeke bouw of een boerderi’je. (Foto’s en tekst: Johan Veenstra)

Snackbar/kefé Bliede in Noordwoolde komt al veur in disse serie onder nommer 286. Mar butendeure bi’j et terras staot op een bod ok nog de tekst Bliede daj’ d’r bint! Ze bin in Noordwoolde nogal vaeke bliede, want onder de plaknaembodden van dat dörp staot Bliede dat jim oons dorp bezuken (nommer 47). En wi’j bin weer bliede omdat ze in Noordwoolde et Stellingwarfs zo vaeke bruken. (Foto en tekst: Johan Veenstra)