Redaktie

Aachter et raem van et ni’je onderkommen van de Stellingwarver Schrieversronte in Berkoop hangt ok een bericht. Et is op disse wieze meer as dudelik wanneer aj’ d’r terechtekunnen. (Foto en tekst: Johan Veenstra)

Et gebouw in Berkoop daor de Stellingwarver Schrieversronte meer as 25 jaor zien plak hadde, staot d’r now zuver wat leeg en ontredderd bi’j. Een briefien aachter et raem vertelt waor aj’ now wezen moeten aj’ naor et Stellingwarver taelinstituut toe willen. Et is in wezen mar een haenetree van et oolde gebouw of. (Foto en tekst: Johan Veenstra)

Bi’j een mooie ploktuun in Steggerde zag Henk Jager disse baank mit een Stellingwarver tekst.

Henk Jager, die disse naeme bi’j Der Izzerd zag en d’r een foto van maekte, geft an: ‘In de maoden staon gien wilde rusken meer, mar de naeme bevat wel ‘wild Stellingwarfs”.

Dit viadukt bi’j De Smilde, onder de weg deur van De Smilde richting Beilen, het de mooie naeme Vorrelveen. Et woord vorrel geft onder eren een vierde diel argens van an. In dit geval het et te maeken mit de veenderi’je; veenarbeiders mossen indertied wel een vorrel veen ofstikken. Dat was dan et vierde diel van een stok veengrond.

Veur veerdere uutleg en veurbeelden van et gebruuk van dit aorige woord: zie et Stellingwarfs Woordeboek, diel 3. Dat inkieken kan sund flink wat jaoren ok digitaol! (Foto en infermaosie: Hans Salverda)