Redaktie

In een Stienwieker wiek hebben een tal straoten een Stellingwarver naeme van een bepaold onderdiel uut oold boere-ark, zoas De teeme. In Stellingwarf zels kennen we et woord veural as ‘de tieme’. Et was een warktuug om et huj, as dat ienkeer in et zwil lag, bij mekere te tiemen tot een bulte. (Foto: Henk Jager)

Annie Dedden zat op ‘e fiets in Wolvege en zag dit bod mit een waorschouwing in et Stellingwarfs: Fietsers ofstappen, deurtrappen het gien zin 😉 (en kost 45 euro). Et benaoderen van meensken in heur eigen tael is van belang, dit is dan ok een mooi initiatief! Of iederiene him now mitien holen zal an an disse waorschouwing…? Annie in ieder geval wel, al was et mar om d’r disse foto van te maeken!

Et Oerthepad in Stienwiek. ‘Oerthe’ is et Stienwiekers veur et Nederlaanse begrip ‘woerd’. Daor wodt onder eren een stok laand mit bedoeld dat bi’j overstromings niet onderlopt. De ‘h’ in et woord is aenlik niet neudig, mar zal veur de ‘sjeu’ toevoegd wezen. (Foto en gegevens: Henk Jager)

Rams Woerthe, een mooie naeme van een mooi park in Stienwiek. ‘Woerthe’ is een variaant van ‘oerthe’.  ‘Oerthe’ is et Stienwiekers veur et Nederlaanse begrip ‘woerd’. Daor wodt onder eren een stok laand mit bedoeld dat bi’j overstromings niet onderlopt. De ‘h’ in et woord is aenlik niet neudig, mar is grif veur de ‘sjeu’ toevoegd. (Foto en gegevens: Henk Jager)

In resteraant De Fûke in Echten zag ik de ankondiging daj’ daor op 11 feberwaori onder et genot van een happien en een draankien genieten kunnen van livemeziek van et Kuunders Kwintet. (Foto en tekst: Johan Veenstra)