Redaktie

Twie mitwarkers van Stellingwarfs in ’t wild zaggen dit pamflet mit de ankondiging Vledder giet knall’n: Hans Salverda in Diever (foto) en Henk Jager in De Blesse. Of ze beide ok naor et oktoberfeest toegaon zullen, is niet dudelik… Pattietoeren wodt wel es docht dat ‘giet’ (3e persoon inkelvoold) veur ‘gaat’ Drents wezen zol. Mar mit naeme een groot pat van Oost-Stellingwarf bruukt dit zo. Taelkundig zien vaalt de tael van Vledder trouwens onder et Stellingwarfs, perveensiaole greenzen bin now ienkeer niet etzelde as taelgreenzen.

In Wolvege is een straote mit de naeme De Venne. Vermoedelik gaot et om een oolde veldnaeme en zoj’ daenken dat hier eerder een poele of venne west het. Henk Jager, die de naeme zag en d’r een foto van maekte, het nog op oolde kaorten keken, mar kon die liekewel niet vienen.

De Menkaampe is een hiele mooie Stellingwarver naeme van de menverieninge van Noordwoolde op ’t West van Noordwoolde. Henk Jager van De Blesse zorgde veur de foto en gegevens.

In de baarm veur een verkavelingsboerderi’je in de Niekspoolder bi’j Blesdieke zag Henk Jager van Blesdieke disse vlagge. Et is wel dudelik waor de zuvelboerinne weg komt: Uut Blesdieke! D’r is hier ok een rustpunt om even an te stikken veur een koppien koffie of zoks-zo-wat.

Hans Salverda van Zorgvlied fietst ommeraek graeg, en maekt onderwegens mooie foto’s veur onder eren disse rebriek. As hi’j dan weer zowat an huus toe is mag hi’j nog wel es even anstikken bi’j de gezellige camping De Hertenweide in zien woonplak. Daor kuj’ gewoon Drents en ok Stelligwarfs praoten. De tael van Zorgvlied en wiede omgeving vaalt taelkundig onder et Stellingwarfs, mar et is vanzels begriepelik dat et op dit plak Drents nuumd wodt!