Redaktie

De Slatten is de naeme van een (dubbele) straote in Oosterwoolde. D’r tussenin ligt een wat briede ‘sloot’, en et woord ‘slatten’ het daor mit te maeken. ‘Et slatten van sloden’ betekent et opschonen van sloden; et goed wat uut de sloden haeld numen we ‘slatsel’. (Foto en tekst: Sietske Bloemhoff)

De Fenne is de naeme van een straote in Oosterwoolde. Waoromme d’r indertied deur de gemiente keuzen is om een ‘F’ te bruken in plak van een ‘V’ zal wel een raodsel blieven. In et Stellingwarfs schrieven we gewoon een ‘v’ daor et Nederlaans dat ok dot. ‘Venne’ komt nogal es veur as veldnaeme, ok in Oosterwoolde. Et gaot dan vaeks om een hoeke laand daor vermoedelik eerder ok een venne legen het of argens in de buurt. (Foto en tekst: Sietske Bloemhoff)

Hans Salverda zag op et bod in Wapse (zie ok 483) ok nog een ere naeme staon. Dat is Oens Kiendhuus, de naeme van de butenschoelse opvang in dat plak.

In Wapse hiet de opvang veur ukken ’t Pruugeltie. ‘Prugel’ of ‘prugeltien’ is een slim aorig woord veur een vaeks wat bi’jdehaand klein joongien, dat van alles wil, mar nog niet kan… (Foto en gegevens: Hans Salverda)

Disse peerdeboerderi’je en B&B in Wapse het de mooie naeme Meulegoorn. Een goorn is de benaeming veur een hoekien laand. Hier dus een hoekien laand bi’j een meule. Het hier vroeger lichtkaans een meule op dit plak staon? Oolde Wapsegers zullen je dat grif vertellen kunnen. (Foto’s en tekst: Johan Veenstra)