Redaktie

Alle zaelen in De Landerijen in Ooldemark hebben naemen die mit et oolde boerebedrief te maeken hebben. Huj of zaod kwam an de miete bi’j et boerehuus. D’r wodde een flut roegte op daon om inregenen te veurkommen. As nommer 82 in disse serie is De Miete ok as straotnaeme in Wolvege opneumen. (Foto en tekst: Johan Veenstra)

De Landerijen is et dörpsservicecentrum veur Ooldemark en omstreken. Et bestaot uut een woonkompleks en een zaelecentrum. De vuuf zaelen hebben daor allegeer mooie streektaelnaemen. Ik hebbe al een keermennig verteld veur een groep oolderen in een zael mit de naeme De Deele. Op ’e dele wodde vroeger et huj beweerd. Peerd en waegen (mit huj) reden deur de eupenstaonde baanzerdeuren de dele op en dan wodde et huj mit de vörke van de waegen in et hujvak steuken. (Foto en tekst: Johan Veenstra)

Henk Jager van De Blesse komt nog wel es in Stienwiek, en zag daor kotleden et gebruuk van et Stellingwarfs bi’j dit meubelhuus.

In Diever zag Hans Salverda de straotnaeme Bultie bi’j de krusing mit de Vlasstraote. Et zal grif zo wezen dat daor argens wat een verhoging in et laandschop zit.

In verzorgingshuus BerkenStede in Wolvege is een ruumte die ’t Hoffien hiet. Al die Stellingwarver naemen in et gebouw geven de meensken grif wel een betien een vertrouwd gevuul. (Foto en tekst: Johan Veenstra)